Rhagor Am Y Shed

Dros y blynyddoedd, mae’r Shed wedi bod yn storfa, yn garej a hyd yn oed yn gartref i drefnwyr angladdau. Mae ei hanes yn gyfoeth o amrywiaeth. Ond ers nifer o flynyddoedd bellach, mae wedi bod yn sefyll yn segur ac yn wag. Bellach, gyda chefnogaeth y gymdeithas dai elusennol Grŵp Cynefin, a Grŵp Gweithredu Trigolion Meliden, mae dyfodol Y Shed yn edrych yn wahanol iawn.

Ni fydd yr adeilad bellach yn angof a bydd yn cael ei drawsnewid yn ganolbwynt bywiog ar gyfer y gymuned a thwristiaid gyda chaffi, siop ac arddangosfa hanes. Bydd yn hafan a fydd yn cynnig hoe i gerddwyr fwynhau paned, lle gall teuluoedd hurio beics a mynd ar antur, neu lle gall ffrindiau gwrdd dros ginio. Bydd yr arddangosfa hanes yn rhoi llwyfan i’r pentref a'i straeon i genedlaethau newydd, gan fwrw goleuni ar fywydau trigolion Meliden dros y blynyddoedd. Gan gynnig gofodau gweithio creadigol i fusnesau a chrefftwyr lleol, bydd Y Shed hefyd yn helpu darpar entrepreneuriaid ac artistiaid i ddatblygu eu busnesau o fannau unigryw gyda ffryntiau gwydr sy’n edrych dros olygfa ysbrydoledig yr arfordir.